ദരിദ്രനായ ഒരു നെയ്യുറുമ്പും ഒരു പിടിയാനയും തമ്മിലുള്ള പ്രണയകഥയാണ് ഇവിടെ ചിത്രരൂപത്തിലേയ്ക്ക് മാറ്റപ്പെടുന്നത്. നേര്‍ത്ത രേഖകളിലൂടെ അതിമനോഹരമായി കഥയും അതിന്‍റെ പശ്ചാത്തല വര്‍ണ്ണനയുമൊക്കെ വ്യക്തമായി നമ്മിലേയ്ക്ക് സംക്രമിക്കുന്നുമുണ്ട്. സ്നേഹം,വിശ്വാസം,പരിഗണന, സമാശ്വാസം, സൗഹൃദം,ശത്രുത എന്നിങ്ങനെ മാനുഷികം എന്നു നാം കരുതുന്ന വിശേഷവികാരങ്ങളെല്ലാം പ്രകൃതിയിലെ മറ്റു ജീവിവര്‍ഗങ്ങള്‍ക്കുംകൂടി ബാധകമാണ് എന്ന വസ്തുത കഥാവസ്തുവിനോടൊപ്പം നര്‍മ്മരൂപേണ അവതരിപ്പിക്കുകയാണ് കഥാകാരന്‍. ചിത്രകാരി അതില്‍ തന്‍റെ സര്‍ഗ്ഗശേഷികൂടി കലര്‍ത്തി ആസ്വാദ്യമായ ഒരു വിശിഷ്ടവിഭവമാക്കി നമ്മുടെ മുമ്പില്‍ എത്തിക്കുന്നു.
ചിത്രകാരിയായ മാളവിക തന്‍റെ ഉള്ളിലെ തിങ്ങലും വിങ്ങലും ആര്‍പ്പും അലിവും ഇളനീരുപോലെ പാല്‍നുരപോലെ ശര്‍ക്കരവെള്ളംപോലെ പൂനിലാവുപോലെ പൊരിവെയില്‍ പോലെ വ്യത്യസ്ത രുചിഭാവങ്ങളില്‍ സമപ്രായക്കാരുടെ ഉള്ളിലേയ്ക്കു പകര്‍ത്തുകയാണ്....
